血腥既一期﹗先有神聖大開殺戒,擊殺無數古代日本軍;再有阿西慘俾監生斬斷手,危在旦夕﹗阿天則忽發神力,將凶徒狠狠打至血肉模糊;最後係阿天前生俾飢餓既災民切肉而食…
睇完今期雖然有d不安,但係今集內容豐富,編排亦的確唔錯。
首先以神聖遇見我地熟悉既眾天神,解釋神聖人間輪迴一事。而見倒如來佛祖既出現,可以加深讀者對人間同宇外流化關係既理解,亦將神聖要毀滅人間既舉動合理化。
中間阿天一段則帶出佢同阿西既兄弟情,(唉~~雖然阿西出場唔多,不過自已一直都幾鐘意呢個義氣角式,咁樣死法真係慘…)同時帶出新人物,金佛內既神秘人(唔知係咪六神使之一呢?)
最後就由心藍將阿天回到過去,由晶體降落凡間既第一世講起。睇到呢段令我想起<龍虎5世>主角返到前5世既一段劇情。
總括黎講3段都編排得唔錯,最後亦都吸引倒人追下期唷﹗
見倒武田信玄等既歷史人物出現,不期然會諗阿天前幾世會唔會都係大家熟悉既人物呢?如果係相信會幾過癮呢﹗(就好似神兵F咁~^_^)而人間既劇情明顯比宇外流化好睇,相信龍少要好好諗下點樣平衡兩線既發展喇﹗(雖然冇左黃易大師,不過有文敵幫手,對劇本即時有返信心~哈﹗)
今期除左血腥畫面有驚喜外,阿天無端大發神威既舉動亦嚇左我一跳。佢竟然好似Superman咁有超遠視力(相信都有透視能力),仲曉飛天,真係誇張得滯wor~~雖然救阿西一幕係幾感人,不過描寫得佢太勁,我怕重蹈初時坤劫設定大犀利覆轍,龍少要小心D去寫阿天o係人間既能力耶。
睇完今期最想知既係阿天既前生,金佛中既神秘人,當然仲有預告提及既人間神兵啦﹗12期只出左白象古刀、陽炎同埋禁戒絕三款神兵,龍少都係時候出D勁兵器喇﹗
P.S <無量神兵界>同今期既內容有咩關係呢? |